تعبنا، تمرمدنا، فدّينا، بيّلنا، روحنا طلعت، بالغصّة دمّعنا
و شنيّا !!!!
شيء، ماعاد شيء
باش نبدالكم الحكاية مالتالي، معناها مالاخّر، كيما حالنا، كيما همّنا
اما استناوها مالقدام
امّي سيسي، تعرفوها، النّاس الكل تعرفها
امّي سيسي اللي كانت تكنس، تكنس
امّي سيسي اللي لقات فليّس
تي امّي سيسي
الحاصل، امّي سيسي تحب تقلّكم حاجا،
ماهو ثورة، و اهداف، و شهداء و جرحى و حرّية و مطالب و تأسيسي و دستور و انتخابات و شرعيّة .. و الحكايات هاذيكا الكلّ
امي سيسي تحب تقلّكم : سيسي امّك
سيسي امّ اللي خرج و عيّط تأسيسي
سيسي امّ اللي قال يسقط النّظام البوليسي
سيسي ام و سيسي بو اللي قال انتخبوا
و سيسي مذهبوا
قالوا امّي سيسي
شنّيا امّي سيسي !!
معناها يا هوما يا السّيسي
تي نحنا كنا جايبينها تفصيصي
قلنا ناس كبار، نقدّروهم، نحترموهم
يكون منّا نحنا العقل
ناس عانات قبل
ياخي ولات طفل3 سنين و سيسي !!
طفلة 12 سنا عندها الحقّ في السيسي !!
حديثنا ولاّ الكلّوا سيسي
تي مالا سيسي امّك، و سيسي بو اللي جابت امّك
تي لا موش سبان راهو !!
سيسي امّك معناها سيسي امّك كيما بوك
سيسي النّاس اللّي حرموك
سيسي الي قالك شرعيّة و سيسي اللي يعارض في هاذيّا
شبيكم !! مفجوعين
سيسي موش سبّان راهو
حاشا و كلا امّي سيسي
نحنا موش متاع سبّان، نحنا اولاد عايلة امّي سيسي
نحنا الكلام الزّايد لا، و النّاقص لا، الكلام بكلّو لا
نحنا جيل فاسد، سراولنا طايحا، شعوراتنا بالجال
نحنا جيل فاسد، تربّينا في الشّارع
الشّارع .. الشّارع ..
امّي سيسي، تعرف انتي الشّارع ..
امّي سيسي، موش انتي كنت ديما تكنس في الشّارع !!
امّي سيسي، موش الشّارع فيه الفليّس، و حكاية فليّس مع فليّس يولي كديّس
امّي سيسي، في الشّارع ماجاش الحاكم عملك سيسي امّي سيسي، ماجاش شكون دافع عليك مالسيسي
ماجاش شكون عاونك باش نحّيت بعبوص القطّوس
امّي سيسي، في الشّارع ما قلتش ديڨاج للسّيسي
امّي سيسي، ياخي ستانست بالسّيسي و ماعادش تطيق فراڨوا
امّي سيسي، رانا نحنا صغار و اولاد شارع اما بلاش سيسي
رانا نحنا اكبر من هكاكا، رانا نحنا اللي نحّينا السيسي
و سيسيناهولنا
نحنا اللي عملنا التأسيسي و سيسيناهولنا
نحنا اللي عيطنا في الشارع ديڨاج و سيسيناهولنا
امّي سيسي، نحنا فقنا، و فهمنا و قمنا و تحرّكنا
و في الاخر، امّي سيسي
نحنا ماكنسناش باش نلقاو فليّس
نحنا كنسنا باش نقولوا ..
سيسي امّ اللّي خلّى امّي سيسي تكنس
